Fimm rauð flögg

Ég fór á Tinder. Ég fór á Tinder í þeim eina tilgangi að hitta mann, eða menn, til að stunda kynlíf með og það án allra skuldbindinga. Einasta eina skilyrðið sem ég setti fyrir þessu er að mig langi til að sofa hjá viðkomandi aðila. Það er ekki sérlega flókið, er það? Hvernig er þá hægt að klúðra því? 

Ég sá einn þeldökkan inni á Tinder. Ég svæpaði til hægri og viti menn, það var match! Við byrjuðum að spjalla smá í kjölfarið og töluðum um okkar væntingar. Við vorum bæði á sömu línu, okkur langaði í félaga til að hitta af og til og stunda kynlíf með. Hann var einhleypur og bjó einn. Bingó!
Hann kvartaði eiginlega strax undan því að íslenskar konur væru leiðinlegar við hann, þær misstu áhugann upp úr þurru og létu sig hverfa. Ég lofaði kauða að ég myndi ekki gera slíkt hið sama. Hann kvartaði samt og kveinaði meira yfir íslenskum konum og sagði meðal annars að þær væru rasískar, og þá spratt upp fyrsta rauða flaggið. 
Við ákváðum samt að láta slag standa og hittast einhverjum dögum seinna. Ég sagði að ég vildi hitta hann á opinberum stað til að byrja með, eins og á kaffihúsi til dæmis. Hann samþykkti það með semingi, og þar kom annað rautt flagg.
Jafnvel þó hann væri búinn að samþykkja það að hitta mig á kaffihúsi, þá talaði hann um það að hringjast á eða taka myndsímtal til að kanna hvort okkur myndi líka hvort við annað. Ég var ekki spennt fyrir því. Hann sagði að það myndi hjálpa til og við gætum þá eytt óvissunni yfir því hvort okkur litist vel hvort á annað. Ég benti honum á að við værum þegar búin að ákveða að hittast til að skera út um það, þá fór að glitta í þriðja rauða flaggið.
Jújú, sagði hann, en honum fannst það fyrirhöfn að hittast úti í bæ ef að það yrði mögulega ekkert meira úr því. Fjórða rauða flaggið birtist á sjóndeildarhringnum.
Ég sagði honum frekar ákveðin að ég myndi bara sofa hjá honum ef að mig langaði til að sofa hjá honum. Þá kom upp úr krafsinu að hann vildi ekki hittast yfir kaffibolla. Hann sagði að hann vissi nú þegar að hann vildi sofa hjá mér, og að hann væri að leita að konu sem léti ekki tilfinningar sínar ráða ferðinni, heldur einhverri sem væri til í að setja tilfinningar sínar til hliðar og hoppa upp í rúm með honum. Fimmta rauða flaggið argaði á mig og ég tók mark á því.
Mig langaði að benda honum á að það væri heil starfstétt (ólögleg á Íslandi að vísu) sem væri akkúrat í þessu. Ég hamdi mig og sendi honum til baka að þá væri ég einfaldlega ekki konan sem hann var að leita að. Ég óskaði honum góðs gengis og un-matchaði okkur á Tinder. 

Fljótlega fékk ég WhatsApp skilaboð frá kauða (við skiptumst jú á númerum því við ætluðum að hittast). Hann var ósáttur, ruddalegur og sagði að ef vildi gott kynlíf án skuldbindinga ætti hann heima í Breiðholtinu (hann gaf mér heimilisfangið sitt sko). Með fylgdi óumbeðin nærmynd af typpi, sem ég geri ráð fyrir að hafi verið hans typpi. Mikið var ég glöð að fá þarna svart á hvítu að ég valdi rétt. 

Eftir á að hyggja þá held ég að öll skilaboð og samskipti eyðast þegar maður un-matchar einhvern á Tinder. Þannig að mögulega hefur hann ekki séð skilaboðin frá mér þar sem ég óska honum góðs gengis með áframhaldandi veiðar. Eðlilega hef ég þá einfaldlega gufað upp í hans augum, sem ég sagðist ekki ætla að gera. Ég er alveg með smá samviskubit yfir því en ég vissi ekki betur þá. 

Hinsvegar er ég ekki með samviskubit yfir því að hafa hafnað honum og bent honum á hina fiskana í sjónum.