Tinder og tíðarhringurinn

Já, ég skal játa það. Ég er með tinder. Ég kíki þangað einstaka sunnudaga þegar ég hef ekkert fyrir stafni, þegar forvitnin bankar upp á, eða þegar greddan kitlar taugarnar. 

Tvennt af þessu átti við í gær þegar ég opnaði appið og fór að skrolla. Ég sópaði til vinstri og hægri eins og enginn væri morgundagurinn. Þangað til einn guðdómlega fallegur birtist á skjánum. Ég skoðaði hann gaumgæfilega en endaði á að sópa honum til vinstri. Það helltist nefnilega yfir mig sú tilfinning að hann væri hættulegur og ég ætti ekki að hitta hann. Ég hjó eftir þessu hjá mér.

 
-Í fyrsta lagi þá er ekkert sem segir að fallegur gaur á tinder sé beinlínis hættulegur af því að hann setur sig í einhverjar stellingar á myndunum sínum.
-Í öðru lagi þá kannast ég ekki við að upplifa þetta svona. Gaurar á tinder eru annaðhvort heitir, sætir, heillandi eða bara ekki fyrir mig (eða einhver blanda af þessu). Ég hengi yfirleitt ekki einhverjar sérstakar tilfinningar við þá. 

Mig rámaði þá eitthvað í að þetta gæti tengst tíðarhringnum, og ég hugsaði að sennilega væri ég að nálgast blæðingar. Mig minnir nefnilega að konur sæki frekar í "góðu gaurana" í kringum blæðingar en "vondu strákana" í kringum egglos.

Eftir smá leit á google komst ég að því að það var ekki endilega málið. Konur draga marktækt úr hegðun sem getur talist áhættusöm eða hættuleg í kringum egglos. Á sama tíma eru konur graðari í kringum egglos. Þetta gæti skýrt hvort tveggja; að ég var að sópa á tinder og fannst þessi tiltekni dúddi eitthvað hættulegur.